මදුනාගල ආරණ්‍යය

මදුනාගල ආරණ්‍යය

               මදුනාගල ආරණ්‍යය හම්බන්තොට දිස්ත්‍රික්කයේ අම්බලන්තොට ප්‍රාදේශිය ලේකම් කොට්ඨාසයේ  කොග්ගල්ල ගමට නුදුරුව පිහිටා ඇත. සුරියවැව නගරයට පැමිනද, නැතිනම් අම්බලන්තොට බැරගම මාර්ගයේ පැමිණද මෙම ස්ථානයට ලගාවිය හැකිය.

           බැරගම ආසන්නයේ වන රක්‌ෂිතයේ පිහිටා  ඇති මෙම ඓතිහාසික ආරණ්‍ය සේනාසනය ආරම්භ කර ඇත්තේ බෝධිසත්ව ගුණෝපේත අතිපූජ්‍ය වතුරුවිල ශ්‍රී ඤාණානන්දාභිධාන වනවාසී මහනාහිමිපාණන් වහන්සේය. 1946 ජුනි මස 30 වැනිදා මෙම වනාන්තර ප්‍රදේශයට පැමිණි ගල්ලෙනක වාසය කරමින් මෙම ආරණ්‍ය ආරම්භ කර ඇත.  කළුගල ආරණ්‍ය සෙනසුනේ සිට මෙහි පැමිණි  මාහිමියෝ ගිහිවාසයක්‌ නැති අලි කොටි වලසුන් සිටින මේ වනයේ ජීවත්වෙමින් අතිශයින් දුෂ්කර ජීවිතයක්‌ ගත කළහ.

              වර්ෂ කීපයක්‌ ගතවන විට මදුනාගල අංගසම්පූර්ණ ආරණ්‍යයක්‌ බවට පත්කරන්නට උන්වහන්සේ සමත්වූහ. උපෝසථාගාරය සහිත විහාර මන්දිරය තපෝවනය, නන්දවනය කඨාරම් කෙටූ පැරණි ගල්ලෙන් සහිත මෙම භූමි භාගය පෙර රහතුන් වහන්සේලා පාදස්‌පර්ශය ලැබූ පින්බිමක්‌ බවට ප්‍රකටය. පෞරාණික ගල් කටාරම්ද සෙනසුනේ තවමත් දක්‌නට ඇති බ්‍රාහ්මී අක්‌ෂර සහිත සෙල්ලිපි ඊට සාක්‌ෂි දරයි.

 
             මදුනාගල ආරණ්‍යයේ යෝගාවචර භික්‌ෂූන් වහන්සේලා කිහිපනමක් වැඩ වාසය කරයි. මදුනාගල වන සෙනසුන වතුරවිල වනවාස සංඝ මූලස්‌ථානාධිපති අතිපූජ්‍ය මහකන්දේ රතනපාල අනුනායක ස්‌වාමීන්ද්‍රයන් වහන්සේ යටතේ පාලනය වේ. මෙහි ලෙන් රැසක් ඇත. ඒවායේ යෝගාවචර භික්‌ෂූන් වහන්සේලා වැඩ වාසය කරයි.

             භික්‌ෂූන් වහන්සේලාට දන් පිළිගැන්වීමට සදහා  සැම ප්‍රදේශයකින්ම බැතිමතුන් පැමිණේ නියමිත දිනට පෙර දින මදුනාගලට එන මේ බැතිමතුන්ට නැවතීමට ශාලා පහසුකම්ද තිබේ. තපෝ භූමියේ සිට කි. මී. 2 ක්‌ පමණ දුරින් රක්‌ෂිත භූමියෙහිම පිණ්‌ඩපාත ශාලාව පිහිටා ඇත.  දන්දීමට එන පිරිස පෙරදින ගිලන්පස, පසුදා උදේ දානය, දහවල් දානය පිරිනමා පිං ලබාගෙන රක්ෂිත භුමියේ සිටින සතුන්ගේ හා තුරුලතා වල අසිරිය විද යාමටද අමතක නොකරයි. පොහෝ දිනවලට සිල් සමාදන්වීමට විශාල වශයෙන්උපාසක උපාසිකාවන් මෙම ස්ථානයට පැමිණෙයි.  

‍               දකුණු පලාතේ සංචාරය කරන වෙලාවකට අපේ පෞඩ ඉතිහාසය දැක බලා ගැනිමටත් වන සතුන්ගේ හා තුරුලතා වල අසිරිය විදිමට මදුණාගල යන්න අමතක කරන්න එපා..

මදුනාගල උණු දිය උලපත්

             

මදුනාගල උණු දිය උලපත් යනු ඇඹිලිපිටිය හා හම්බන්තොට නගරයන්ට මැදිව සූරියවැව නගරයට ආසන්නයේ පිහිටා ඇති  සංචාරකයන්ගේ ආකර්ෂණය දිනාගත් ස්ථානයකි. ඇඹිලිපිටිය සිට පැමිනෙන්නේ නම් පදලංගල හරහා සුරියවැව මාර්ගයේද, මාතර සිට පැමිනෙන්නේ නම් නෝනගම හන්දිය හරහා පදලංගල සුරියවැව මාර්ගයේද, හම්බන්තොට සිට පැමිනෙන්නේ නම් මිරිජ්ජවිල හංදිය සුරිය වැව මාර්ගයේ පැමිණ සුරියවැව  හතරමං හන්දිය නමින් හැදින්වෙන ස්ථානයෙන් හැරී කි.මී. 4 ක් පමණ ගමන් කල විට මෙම උණු දිය උල්පත් වෙත ලගාවිය හැකිය.

             

 ඓතිහාසික මදුනාගල ආරණ්‍ය සේනාසනයත් , පුරාවිද්‍යාත්මක වශයෙන් ඉතා වටිනා ඉපැරණී චිත්‍ර සොයාගත් කරඹගල වන රක්‍ෂිතයටත් මැදිව සුන්දර කුඹුරු යායක් මැද මෙම ස්ථානය පිහිටා ඇත.

              

              ස්වාභාවික උණු දිය ස්නානය කිරීමේ පහසුකම යනු සංචාරකයන්ට ඉතා මහගු අවස්ථාවකි

සංචාරකයන්ගේ ගමන් විඩාව දුරුකර ගනිමින් ඖෂධීය ගුණයන්ගෙන් සම්පූර්ණ වූ උණු දිය ස්නානය කිරීමේ පහසුකම් මෙම ස්ථානයේ ඇත. සීතල සුලං හමායන කුඹුරු යායක් මැද සිට, බොහෝ ඖෂධ ගුණයන්ගෙන් සපිරි ස්වාභාවික උණු දිය ස්නානය කිරීමේ පහසුකම යනු සංචාරකයන්ට ඉතා මහගු අවස්ථාවකි.  උණු දිය උල්පතේ ඇති ජලයේ උෂ්නත්වය සමාන්‍යයෙන් සෙන්ට්ග්‍රෙඩ් අංශක 40ක් පමණ වන අතර පි.එච් අගය 7.0 පමණද වේ.

                වර්ථමානයේ මෙම ස්ථානයේ ඇති උණු දිය උල්පත වටකොට ජල ටැංකි 6ක් ඉදිකර ඇත. මෙම ජල ටැංකි හයේ උෂ්ණත්වය එකින් එකට වෙනස් වන ආකාරයට ඉදිකර ඇත. එනම්,මැද ඇති ටැංකියේ ජලය උණුසුමෙන් වැඩිවේ.  මෙහි ජලය තුළ උණුසුම නිසා දිය බුබුළු මතුවනු දැකිය හැකිය. එහි ජලය ටැංකියෙන් ටැංකියට ගලා යමින් ක්‍රමයෙන් උෂ්ණත්වය අඩු වන ආකාරයට සකස් කර ඇති අතර, සංචාරකයන්ට දිය නෑම සදහා එය විශාල පහසුවක් ගෙන දී ඇත.

මෙම ස්ථානයෙහි සංචාරක නැවතුම්පලක් කෞතුකාගාරයක් කුරුළු උයනක්, මින් මැදුරක්,පළතුරු උයනක්ද ඉදිකර ඇත. ඔබත් නිවාඩු අවස්ථාවක දකුණු පලාතේ සංචාරය කරන අතර තුර අපේ උරුමය ගැන ආඩම්බර විමට යායුතුම ස්ථානයකි..